Gina-imbestigaran pa sang provincial government ang rason kun ngaa ginpagwa ni anay Provincial Treasurer Nilda Generoso ang pila ka mga dokumento sang opisina sang Nobyembre 26 sang gab-i pinaagi sa isa ka job order employee.
Nahibaluan nga nagretire si Generoso sang katapusan sang Nobyembre apang sang Nobyembre 26 sang gab-i, nakit-an mismo ni Atty. Rayfrando Diaz ang isa ka job order employee sang Provincial Treasurer’s Office nga nagatulod sang karito nga may unod duha ka mga black nga bag kag isa ka puti nga sako pagwa sa kilid sang Kapitolyo.
Sa interview sang Bombo Radyo kay Diaz, ginpahayag sini nga nagaunod ang mga bag kag sako sang pila ka mga dokumento subong man mga basura.
Gilayon ini nga nagpagwa sang show cause order sang Nobyembre 27 nga nagaserbi nga valid complaint batok kay Generoso matapos sini manduan ang nasambit nga empleyado nga magpagwa sang mga gamit kag dokumento apisar nga wala sang nagakaigo nga diber kag otoridad.
Suno kay Diaz, ginbaton naman sang natungdan ang order kag ginsabat nga wala siya nakahibalo ukon kaangtanan sa empleyado.
Suno sa provincial administrator, ila pagalantawon kun ano ang panan-awan sang legal officer kag pangayuon man ang reaksyon sang bag-o nga acting treasurer sang probinsya kun may yara sang problema sa availability sang importante nga mga dokumento.
Kun wala naman sang problema kag intact ang tanan, wala man ini sang kaso.
Apang magapadayon ang ila imbestigasyon suno diri kun ngaa gab-i ginpagwa ang mga papeles kag ginpaagi pa sa kilid sang kapitolyo.
Suno sa iya, kun wala niya nasugatnan ang empleyado, wala pa ini nadiskubrehan.
Sa karun, wala pa mahibaluan kun ano ang epekto sang nasambit nga tikang kag padayon pa ang ila evaluation.
Ila man ginalantaw kun may iban pa nga mga dokumento nga napagwa sa Provincial Treasurer’s Office sang nagliligad nga mga inadlaw.
