Naghingyo ang presidente sang Association of Barangay Captains (ABC) sa Bacolod City Police Office (BCPO) nga hingadlan ang mga opisyales sang barangay nga wala nagakooperar sa ila mga tikang sa pagpakigbato sa illegal nga druga.
Sa interview sang Bombo Radyo kay Councilor Lady Gles Gonzales Pallen, ginpahayag sini nga sa 61 ka mga barangay sa ciudad sang Bacolod, napulo pa lang ang gindeklarar nga drug cleared.
Bangud diri, suno kay Pallen, ang Bacolod City ang may pinakadutay nga barangay nga gindeklarar nga drug cleared sa bilog nga Western Visayas.
Naintindihan man sini nga may pila ka mga barangay nga malapad ang scope lakip na ang Barangay Taculing gani mabudlay ini nga malab-ot apang suno sa iya, magapangayo sila sang bulig sang City Anti Drug Abuse Council (CADAC) kun paano matigayon nga madeklarar nga drug cleared ang nabilin nga 51 ka mga barangay agud ma-implementar man sang Barangay Anti Drug Abuse Council (BADAC).
Suno diri, iya man hibaluon kun diin nga mga lugar ang wala nagakooperar ang mga opisyales kag pagakuhaon ang ila mga atensyon.
Nagapasalamat man ini sa mga kapulisan nga nagapakig-angot sa tagsa ka mga barangay agud madula na ang illegal nga druga sa ciudad.
Gincongratulate man sini ang napulo ka mga barangay nga nadeklarar na nga drug cleared kag nagalaom nga sa masunod nga mga binulan, madamo pa nga mga kabarangayan ang magapartisipar kag mangin kwalipikado.
