Nakaangkon sang pilas sa ulo ang mag-utod sa Sipalay matapos ginlabo sang isa ka 29 anyos nga suspetsado sa Sitio Tumpok, Brgy. Maricalum, Sipalay City, Negros Occidental, Disyembre 7 sang gab-i.
Sa interview sang Bombo Radyo kay Police Major James Latayon, hepe sang Sipalay City Police Station, ginpukaw sang iloy sini ang suspetsado nga si Bonnen Garcia bangud ginaalegar ginkastigo sanday Rey Parreñas, 35 anyos kag Mark Anthony Parreñas, 27 anyos, ang iya nga amay.
Bangud diri, nangakig si Garcia kag ginhangkat ang mag-utod nga magtapungulay.
Samtang nagainaway sila, ginkuha ni Garcia ang dala sini nga binangon kag pinanglabo ang duha rason kun ngaa nakaangkon ang mga ini sang pilas.
Ginhingagaw ang mga biktima dala sa ospital para sa nagakaigo nga pagbulong.
Suno kay Latayon, indi matuod nga ginkastigo sang mag-utod ang amay sang suspect kag wala ini nakahibalo sang rason kun ngaa nagpagwa sang nasambit nga sugilanon ang iloy.
Apang matapos ang insidente, ginkastigo gid man sang pamilya sang mag-utod ang amay ni Garcia.
Sa karun, nagapadayon pa ang hot pursuit operations sang kapulisan.
