Ginahulat pa sang Department of Education ang go signal nagikan sa National Inter-Agency Task Force against COVID-19 angot sa ginapropose nga limited face to face learning.
Sa interview sang Bombo Radyo kay Ian Arnold Arnaez, spokesperson Dep-Ed-Division of Negros Occidental, ginakonsiderar na nila ang paghimo sang plano agud nga handaan ang pagbalik sang face to face classes.
Suno kay Arnaez, nahatag na sa principal ang instruction nga pagplano sang face to face learning.
Suno diri, dapat nga pungkuan sang planning team ang pagpatigayon sang face to face learning bangud madamo sang dapat ikonsiderar nga mga factors, isa na diri ang mangin desisyon sang Local Government Unit.
Ginakonsiderar man nila ang COVID-19 status kag risk level sa pagbalik sang face to face learning.
Bisan nga ginapahanugutan na ang 50 percent sang mga conferences kag seminars ginatun-an pa nila ang pagbalik sang face to face learning bangud nga mga kabataan ang participants kag dako nga salabton kun mainfect ang mga ini sang balatian.
Apang sa karun planuhan pa nila ang mga dapat himuon sa tion nga magbalik na ang klase bangud natalana na nga magaumpisa ang Christmas break sang mga estudyante sa Disyembre 12.
