Nagapasalamat ang Bacolod City Police Office nga isa sila sa mga prayoridad nga mahatagan sang vaccine para coronavirus disease 2019 (COVID-19).
Santo sa guideliens nga ginpagwa sang Department of Health, number 5 ang uniformed personnel sa priority list kag nalakip diri ang PNP, AFP, PCG, BFP kag CAFGU members.
Sa interview sang Bombo Radyo Bacolod kay Police Lt. Col. Ariel Pico, spokesperson sang Bacolod City Police Office, indi madula sa mga tawo ang pagduha-duha sa Covid vaccine.
Suno kay Pico, indi man pag-ipagwa ang vaccine kun wala nag-agi sa nagakaigo nga proseso sa idalom sang syensya.
Ginpahayag sini nga dako ang mabulig sang vaccine apang dapat nga magsunod sa gihapon sa proper health protocols bisan may vaccine bangud wala nagakahulugan nga wala ang coronavirus sa palibot.
Samtang, ginkompirmar man ni Pico nga yara pa sa quarantine facility ang tatlo ka police personnel nga nagpositibo sa Covid-19 sa surveillance test nga ginpatigayon sang syudad apang asymptomatic sila kag ginahulat nalang nga matapos ang quarantine period kag makagwa ang mga ini.
