Ginkumpirmar ni Executive Assistant to the Mayor Ernie Pineda nga 50 ka mga firecracker vendors ang nag-apply sang special permit agud makabaligya sang palupok sa Bacolod City kadungan sang nagahilapit nga selebrasyon sang New Year.
Sa interview sang Bombo Radyo kay Pineda, ginpahayag sini nga gin-aprubahan na sang Regional Civil Security Unit (RCSU) ang requirements sang mga firecracker vendors kag ginahulat nalang nga mapermahan sang regional director apang kinahanglan nila gihapon nga magsecure sang special permit nagikan sa ciudad.
Suno sa iya, nagpatigayon sang pamulong-pulong kahapon ang Emergency Operations Center (EOC) agud ila malantaw kun ano nga structure sang pagbaligya ang himuon agud ma-observe ang proper health protocols.
Suno sa executive assistant, pareho lang gihapon sang nagliligad nga tuig ang proseso sa pagkuha sang special permit apang bangud sa COVID pandemic, kinahanglan anay nga mag-agi sa EOC.
Suno diri, sa likod sang Pope Francis Tower ang mangin lugar nga sarang lang nga mabaligyaan sang mga palupok kag subject for inspection pa ini sang Philippine National Police (PNP) kag Bureau of Fire Protection (BFP).
Suno kay Pineda, pabay-an lang anay nila nga magproseso ang mga vendors bangud wala pa man sang pronouncement nagikan sa Presidente nahanungod diri apang nagpaandam na sila sa mga ini nga mangaman bangud may risgo sa posibilidad nga dumilian ini sang national government.
