Ginpanginwala sang 3rd Infantry Division sang Philippine Army nga ginakuhaan nila sang personal information ang mga katapo sang media sa Negros Occidental.
Sang tinalikdan nga adlaw, ang nagpakilala nga si Staff Sgt. Ryan Buenavista ang nagpafill-up sa pila ka radio kag print reporters sa Bacolod kun sa diin nalakip sa mga impormasyon sa form ang tuhoy sa educational background, specific address kag miyembro sang pamilya.
Suno kay Buenavista, requirement ini sang 3rd ID sa mga media partners.
Sa interview sang Bombo Radyo Bacolod kay Army Capt. Cenon Pancito III, spokesperson sang 3rd ID, ginpahayag sini nga wala sila nagmando nga pagakauhaan sang personal nga impormasyon ang ila nga media partners.
Suno kay Pancito ila na nga ginapalantaw sa ila nga intelligence operatives kun ano nga ahensya sang gobyerno ang nagmando sini.
Aminado man ang tagpamaba nga bisan siya ang nakibot man sang ginpahibalo siya sa natabo.
Sa karon nagahulat na lamang sila sa feedback nagikan sa intel units kun para sa diin ang pagkuha sang impormasyon sa mga media.
