Ginpatigayon kahapon ang pinakauna nga Media Fun Shoot sa Negros Occidental Police Provincial Office (NOCPPO) kun sa diin naeksperyensyahan sang mga media personnel ang pag-uyat kag pagpalupok sang armas.
Gintudlo naman ang nagakaigo nga pag-uyat sang armas nga ginalakipan sang 9mm short firearms kag M4 long firearms.
Daku man ang mabulig sang program agud nga maanad na sa lupok sang armas ang mga media personnel ilabi na ang mga yara sa field nga kun kaisa yara nagareport sa mga lugar kun sa diin may pagtiniruhay.
Suno kay P/Lt. Abegael Donasco, Deputy PIO sang NOCPPO, tuman ang kalipay ni Provincial Director P/Col. Romy Palgue kag sang mga kapulisan nga madamo sang nakigbahin sa aktibidad.
Ang fun shoot kaupod sang media ang isa man sa paagi agud nga maka-reach out ang Philippine National Police (PNP) sa media vice versa.
Ginlunsyar man ang programa sa tinutuyo nga makatukod sang relasyon sa tunga sang media kag police personnel sa Negros Occidental.
Ginakalipay man sang mga ini nga halos tanan nga media sa Bacolod ang nagsuporta kag nakigbahin sa pinakauna nga Media Fun Shoot.
Ginalauman naman sang mga ini nga nalipay man kag nag-enjoy ang mga katapo sang media.
Suno kay Donasco, nagaplano ang provincial director nga patigayunon ang Media Fun Shoot isa ka bes sa kada bulan agud nga mapadayun ang na-establisyar na nga maayo nga relasyon sang kapulisan sa media.
