Nagpanawagan ang commander sang provincial incident management team sang Negros Occidental sa mga residente nga maabutan sang moratorium sa pagpauli sang locally stranded individuals nga intindihon ang patakaran nga ginapatuman sang local government unit subong nga Christmas season.
Sa interview sang Bombo Radyo kay Dr. Zeaphard Gerhart Caelian, aprubado na sang regional inter-agency task force ang moratorium nga ginhingyo sang madamo nga LGUs sa Negros Occidental.
Suspendido ang pagbaton sang Sagay City sang mga LSI halin sa Nobyembre 26 tubtub Disyembre 10.
May moratorium man ang Ilog halin December to January 3; Cauayan sa December 20 to January 3; Himamaylan, Victorias kag Calatrava sa December 31 to January 3; La Carlota City sa December 22 to January 2; Pontevedra sa December 22 to January 5; kag bilog nga Negros Occidental sa December 24, 25, 31 kag January 1.
Gin-aprubahan man sang RIATF ang moratorium sang Hinobaan halin December 16 tubtub 22; La Castellana halin December 22 to January 5; kag Bacolod halin December 21 tubtub January 3.
Magluwas sa Negros Occidental, gin-aprubahan man ang kaangay nga hingyo sang iban nga LGUs sa isla sang Panay.
Suno kay Caelian, ginadiscourage sang national IATF ang pagbyahe subong nga Christmas season kag ginadumilian man ang party agud malikawan ang COVID transmission.
Bangud sini, nagalaom si Caelian nga maintindihan sang mga residente ang patakaran sang LGU bangud ginahimo ini agud malikawan ang second wave sang virus subong nga nagkanay-kanay na ang kaso sa Negros Occidental.
