Ginkompirmar sang provincial veterinarian sa probinsya sang Negros Occidental nga may yara sila sang nakompiskar nga meat kag meat products sa Bacolod-Silay Airport sang Biyernes.
Sa interview sang Bombo Radyo Bacolod kay Dr. Renante Decena, nakompiskar sang African Swine Fever Task Force sang probinsya ang meat products bangud sa ila hugot nga pagmonitor kag pag-inspection agud nga indi makalusot ang mga karne nga nagikan sa Luzon kag Mindanao nga infected sang African Swine Fever (ASF).
Ginapabantayan man sang opisina ni Decena 24/7 ang seaports kag airports ilabi na ang mga cargo section.
Ginpabuksan naman sang taskforce ang mga nagasulod nga styro box nga dala sang mga Authorized Person Outside Residence (APOR) nga mga pasahero nagikan sa Manila kag natigayon nga makuha ang 14 kilos nga hamonado kag apat ka kilo nga meat products.
Gin-issyuhan naman sang notice of violation kag confiscation order ang nagdala.
Ginsunog naman sang task force ang nakompiskar nga karne.
Ginpahayag man ni Decena nga ginapabantayan man nila ang mga nagtransport sang karne nagikan sa Manila kag magaagi sa Estancia agud masiguro nga may nagakaigo nga papeles ang pagtransport sang meat and meat products.
Hugot man nga ginabantayan sang task force ang puerto sang Bredco, Escalante, kag Negros Oriental agud masiguro nga wala sang makalusot nga karne nagikan sa mga lugar nga infected sang ASF.
Ginpahayag man sang Provincial Veterinarian nga hilway naman nga makasulod sa probinsya ang mga karne kag meat products nga nagikan sa Western kag Central Visayas.
May yara naman sang local nga manufacturer sang hamon sa probinsya sang Negros Occidental.
Nagpanugyan man si Decena nga mas maayo nga indi nalang magdala sang mga meat and meat products sa tion nga magpauli sa probinsya agud indi pagkompiskaron pag-abot sa airport.
Siguruhon man nga natatakan ang karne sang Bureau of Food and Drugs (BFAD) National Meat Inspection Service (NMIS) kag lantawon ang expiration period sang karne.
Nagcoordinate man ang PVO sa mga coast guard nga indi magpakarga sa mga barko kun wala sang may ipakita nga papeles ang pagtransport sang karne.
Sa karun, ginapadayon man nila nga ginapatutukan ang mga nagasulod nga karne sa probinsya.
