Ginpangunahan ni Senate Majority Leader Juan Miguel Zubiri ang opisyal nga groundbreaking ceremony sang P260 million nga Bacolod museum kag auditorium nga patindugon sa Barangay Alijis, Bacolod City.
Suno sa pahayag ni Senator Zubiri, matapos ang malapit tatlo ka tuig nga pagplano, natigayon na gid man nga mapondohan ang proyekto kag natalana nga umpisahan ang construction.
Ang Bacolod museum kag amphitheatre ang gindedicate para sa mga Bacolodnon kasubong man ang mga taga probinsya sang Negros Occidental.
Igapatindog man ang coliseum kag amphitheater agud hatagan sang pagpasidungog ang mga Negrense kag Bacolodnon world class talents.
Mahimo man ini nga mangin tourism destination sang syudad.
Sa tion naman nga matigayon ang Iloilo-Negros Bridge, mangin sentro naman sang madamo nga mga palagwaon kag convention ang patindugon nga pasilidad.
Samtang, nagpasalamat ang alkalde sang syudad sang Bacolod kay Senate Majority Leader Juan Miguel Zubiri bangud siya ang nangin palaagyan agud nga mahatagan sang katumanan ang madugay na nga ginplanuhan nga proyekto.
Suno sa pahayag ni Mayor Evelio Leonardia, nagapakita lamang ini nga ang tanan nga ginapromisa sang senador ang iya ginahatagan sang katumanan.
Sa pihak nga bahin, ginpahayag man ni Department of Public Works and Highways (DPWH) Regional Director Engineer Lea Delfinado nga ang detailed architectural engineering design sang igapatindugon nga Bacolod museum and amphitheater ang himuon pa sang contractor sa sulod sang tatlo ka bulan.
Sa tion nga matapos na nila ini sarang na nila nga maumpisahan ground preparation.
Ginabanta nga suguran ang pagpatindog sang building sa bulan sang Pebrero ukon Marso sa madason nga tuig.
Ang contract duration sang proyekto ang yara sa 385 days ukon masobra sa isa ka tuig.
Suno kay Delfinado ginabanta nga matapos ang Phase 1 sang proyekto sa sulod sang masobra isa ka tuig kun matapos sa sulod sang tatlo ka bulan ang architectural engineering design sang proyekto samtang napasulod naman ni Senador Zubiri ang budget para sa 2021 para sa Phase 2 sang proyekto.
