Ginatinguhaan sang probinsya sang Negros Occidental nga malikawan nga mangin “super spreader” sang COVID-19 ang Christmas season.
Suno kay provincial health officer Dr. Ernell Tumimbang, gamay nalang ang pagsaka sang kaso sa COVID-19 sa probinsya gani magafocus nalang ang mga ini nga mamintinar.
Suno diri, padayun nga ginapanugyan ang pagsunod sa minimum health protocols agud nga malikawan nga mangin super spreader ang ang palaabuton nga holiday celebrations.
Daku naman nga pagpanghangkat sa mga opisyal ang pagpadayun pagpanubo sang kaso, kadungan sang pagsunod sa mga mandato sang Department of Health (DOH).
Panugyan ni Tumimbang nga dapat sugudan sa ensakto ang Christmas season.
Suno pa diri madamo sang paagi agud makaselebrar sang paskwa kaangay sang pagpasigabong sang sterio, kaserola ukon ang pagpa-uwang sang busina sang mga salakyan.
Suportado naman sang probinsya ang pagbawal sang DOH sa paggamit sang torotot.
Paathag ni Tumimbang nga ang pagbuga sang hangin sa torotot ang sarang makalapta sang virus, ilabi na kun may iban pa nga maggamit sang isa lang ka torotot.
Pahanumdom sini ang pagsuksok sang facemask kag faceshield kag ang masami nga paghugas sang kamot ilabi na kun naga-uyat sa mga highly touched areas.
Paathag naman ni Tumimbang nga sa karun lang ginabawala ang torotot kag sarang naman ini nga mabalik sa masunod nga mga tinuig kun mangin hilway na.
Ginapakamaayo naman sang probinsya nga may guidelines ang DOH natuhoy sa pagpatuman sang minimum health protocols kag pagbawal sa torotot.
