Ginpahanumdom sang Negros Occidental Police Provincial Office (NOPPO) sa mga pumuluyo nga madamo sang mga budol-budol nga nagapangbiktima sa Negros Occidental kag Bacolod subong nga Christmas season.
Suno kay P/Lt Abegail Donasco, Deputy PIO sang NOPPO, maghalong ang tanan sa budol-budol bangod masami indi ang mga ini makita nga daw manug-into kundi kaangay nga daw professional.
Apang masami wala nagakatalupangdan nga nagakabiktima na gali kita.
Panugyan ni Donasco nga tsekyarun gid sang makapila ka beses ilabi na kun may kaangatan sa kwarta.
Kasubong man ang mga website nga ginasudlan sa internet nga ginagamitan sang ATM ang dapat nga seguruhon nga matuod-tuod kag rehistrado.
Dapat man nga mangin mabinantayon ang kada isa, ilabi na nga madamo sang nadulaan sang trabaho bangod sa COVID-19.
Suno kay Donasco, nga ang panginahanglanun ang sarang nga makaduso sa isa ka persona nga maghemu sang bisan ano nga paagi agud nga makakwarta, kag isa na diri ang budol-budol nga isa ka sahi sang pagpang-into para sa pangkaugalingon nga benepisyo.
Magluwas sa paghalong, ginpaseguro man sang Philippine National Police (PNOP) nga naka-full alert status ang mga ini sumugod sa Desyembre 16, sa pagsugod sang Simbang Gabi tubtob na sa Enero 2021.
Ginpasalig ni Donasco nga tanan nga mga personnel sang NOCPPO ang magabantay kalakip sang mga patrol, kapulisan sa mga dalanun, mobile patrol nga magapabilin sa mga estasyon agud magseguro sang kahilwayan kag seguridad sang mga pumuluyo sa Negros Occidental subong nga Desyembre.
