Wasak ang unahan nga bahin sang isa ka pribado nga salakyan matapos magbunggo sa isa ka public utility jeepney (PUJ) sa Rizal-Mabini Street, Bacolod City kagab-i.
Sa interview sang Bombo Radyo kay Roger Dela Serna, driver sang PUJ nga may routa Bacolod-Fortune Town, nagikan ini sa downtown sakay ang 11 tanan ka mga pasahero kag mahinay ang iya padalagan.
Suno kay Dela Serna, madasig ang pagpadalagan sang private car kag hinali lang nga nagbunggo sa kilid sa iya salakyan.
Maayo na lang suno sa iya bangud wala sang may nasamaran sa iya mga pasahero.
Samtang, nagapanindugan naman ang driver sang pribado nga salakyan nga indi madasig ang iya pagpadalagan.
Suno kay Neil Letigio, nagikan ini sa City Scapes kag nagwithdraw lang sa isa ka bangko kag magapadulong na kuntani sa isa ka BPO company sang wala niya nanotisyaran nga may nagapakadto nga jeep.
Suno kay Letigio, akusasyon lang nga madasig ang iya pagpadalagan kag nagatan-aw gid siya sa dalan.
Gindugang man sini nga kun madasig ang iya pagmaneho sang salakyan, malala kuntani ang impact nga matuga sini.
Wala man sang major injuries nga naagom si Letigio kag ang upod sini sa salakyan.
