Indi pabor ang bise-alkalde sang Bacolod City kag pinuno sang interagency task force sang ciudad sa pagpabalik sang face to face classes sa masunod nga tuig kadungan sang pag-abrubar ni Presidente Rodrigo Duterte sang pilot implementation sang face-to-face classes sa pili nga mga eskwelahan sa mga low risk areas sa bilog nga bulan sang Enero santo sa rekomendasyon sang Department of Education (DepEd).
Sa interview sang Bombo Radyo kay Vice Mayor El Cid Familiaran, ginpahayag sini nga indi siya pabor sa pagpabalik sang face to face classes bangud risgo ini sa kaluwasan sang mga estudyante.
Suno kay Familiaran, nakabakal naman sang mga gadgets ang mga ginikanan para sa online kag virtual learning.
Ginduha-duhaan man sang bise-alkalde kun masarangan sang mga manunudlo nga makontrol ukon mapacomply ang mga kabataan sa health protocols.
Suno sa iya, mas maayo kun hulaton na lang nga makaangkon sang COVID vaccine amu pagpatuman sang face-to-face learning bangud manugtapos naman gihapon ang second semester.
Nagapati man ini nga indi madala ang Bacolod City sa nasambit nga pagpatuman bangud indi makabig ang ciudad nga low risk area.
Suno diri, bangud madamo ang estudyante sa ciudad, nagadangat sa 50 ka mga kabataan ang naga-occupy sa isa ka classroom.
Nagapati si Familiaran nga indi mapatuman ang social distancing kun ibalik ang face-to-face learning sa ciudad indi kaangay sang mga rural areas nga madutay lang ang mga estudyante.
