Nagapati ang presidente sang Alliance of Concerned Teachers (ACT)-Negros Occidental nga dako nga risgo para sa mga kabataan ang plano nga dry run sang face-to-face classes sa masunod nga tuig.
Madumduman nga gin-aprubahan ni Presidente Rodrigo Duterte ang pilot implementation sang face-to-face classes nga magasugod sa Enero 11 tubtob 23, 2021.
Sa interview sang Bombo Radyo Bacolod kay Gualberto Dajao, ACT-Negros Occidental president, ginpahayag sini nga apisar sa mga low risk areas lang plano ipatuman ang dry run sang face-to-face classes, may yara sa gihapon sang risgo para sa ikaayong lawas sang mga kabataan ilabi na nga wala pa sang available nga bakuna.
Dugang pa sini nga dapat may yara sang garantiya nga ihatag ang DepEd kag national government sa mga manunudlo.
Samtang, aminado naman si Dajao nga kinahanglan magpatigayon sang face-to-face classes ilabi na sa mga subject nga nagakinahanglan sang laboratoryo ukon practicum.
Pananglitan nga madayon gid man ang face-to-face classes suno kay Dajao, dapat nga sundon gid ang husto nga minimum health protocol agud malikawan ang paglatunay sang coronavirus.
