Patay ang isa ka barker ukon dispatcher matapos nga ginluthag sang riding in tandem suspects sa Bangga Riles, Barangay Alijis, ciudad sang Bacolod kagab-i.
Ang biktima ang ginkilala kay Mitzel Yap, 34 anyos, single, isa ka barker kag residente sa Purok Maanyag 2, Barangay Alijis, Bacolod City.
Suno kay P/Lt. Conrado Espino Jr., hepe sang Bacolod Police Station 7, nagabantay kag nagabaligya sang prutas kun kaisa ang biktima.
Samtang nagabantay ini sang prutas, may duha ka mga persona nga nakasakay sa motorsiklo kag gintiro si Yap sang lima ka beses kun sa diin naigo ini sa ulo, duha ka kamot kag naglapos sa dughan nga gintunaan sang iya nga kamatayon.
Santo sa impormasyon nga nakuha sa palibot, wala naman sang nakatalupangod sa mga suspetsado.
Nahibaluan nga bilang barker masami ini nagapaninggit sa mga motorista gani ginalantaw man nga anggulo sa pagluthang diri amo ang pagpaninggit sa mga suspetsado.
Paathag ni Espino nga indi nila sarang ma-inspeksyon ang tanan nga nagalabay kun ano ang mga dala agud matumod kun may pusil kag mahimo lang ini kun may ginbutang nga checkpoint.
Nabalitaan man sini nga nagasulod sa paggamit sang iligal nga droga ang biktima.
Nagpasalig naman si Espino nga magapatigayon ini sang mas madalom nga imbestigasyon sa krimen kag ginapaseguro nga indi mag-untat sa pagpatrolya ang mga kapulisa.
Samtang ginpahayag naman sang iloy sang biktima nga ginkilala kay Nenita Yap nga indi salawayon ang iya bata.
Si Mitzel ang wala pa sang asawa kag sa iloy pa nagapuli.
Dugang pa sini nga wala pa sya sang nabatun nga record sang gamo nga imbulbado ang iya nga bata.
Ginapinsar naman sini nga nasal-an lang ang bata amo nga ginluthang.
Suno pa sa iloy, nakabati ini sang sugilanon nga madamo pa sang ginpangtayaan sang armas nga mga nagabaligya sang isda sa unahan lang nga bahin kun diin ginluthang ang iya nga bata.
Nagakumpormi naman ini sa pagpadayun sang imbestigasyon agud mahibaluan kun sin-o ang may kahimuan sa pagpatay sa iya nga bata nga si Mitzel Yap.
