Nagapangayo sang pasaylo ang pinuno sang Bacolod Traffic Authority Office (BTAO) sa mga inconvenience nga tuga sang trapiko bangud nagadamo sa karun ang mga salakyan sa dalanon samtang nagahilapit ang Paskwa.
Sa interview sang Bombo Radyo kay BTAO Head Police Lt. Col. Luisito Acebuche, ginpahayag sini nga ila ginatinguhaan nga mapahagan-hagan ang trapiko ilabi na sa karun nga madamo nga mga taga gwa sang Bacolod City ang nagapadulong sa ciudad agud mamakal sang mga malls.
Suno kay Acebuche, may yara sila sang kabug-usan nga 426 ka mga traffic enforcers apang 320 lang ang aktibo sa dalan kun sa diin ginatunga ang mga ini sa duha ka shift gani may yara sang 160 ka mga traffic enforcers nga nakaduty kada shift.
Suno sa iya, alas 6:00 sang aga tubtob ala 1:00 sang hapon ang una nga schedule sang mga enforcers kag ala 1:00 sang hapon tubtob alas 7:00 naman ang ikaduha apang bangud may okasyon sa karun kag sa pagsugod man sang Simbang Gabi, may 80 ka mga enforcers nga iya ginhatagan sang special tasking sa Central Market kun sa diin naga-extend sila halin alas 3:00 sang kaagahon tubtob alas 10:00 sang gab-i.
Gindugang man sini nga sa bilog nga bulan sang Disyembre, masako sila sa road clearing operations santo man sang mando sang Department of the Interior and Local Government (DILG).
Ini agud mas mangin maayo ang dalagan sang mga salakyan sini nga yuletide season.
