Dakop ang ginaalegar supplier sang iligal nga droga sa Barangay Singcang Airport kag duha ka iban pa sa ginpatigayon nga drug buybust operation sa Purok Paloma, Barangay 16, Bacolod City kahapon sang hapon.
Suno kay P/Capt. Jun Ray Batadlan, hepe sang Bacolod Police Station 8, ang subject sa drug buybust operation ang ginkilala kay Sunday Villa, 51 anyos kag residente sa nasambit nga lugar.
Nadakop man sa akto nga nagapanag-iya sang iligal nga droga kag drug paraphernalia ang duha sini ka paryente nga ginkilala kanday Maria Evelynne Tibang kag Ryan Juanillo nga lunsay mga residente man sa lugar.
Nakuha gikan sa paghinakop sang mga suspetsado ang duha ka elongated kag isa ka heat sealed transparent plastic sachet sang suspected shabu nga nagabug-at sang pito ka gramos kag nagabalor P48,300.
Suno kay Batadlan, naka-agi na priso ang biktima sa kaangay nga kaso kag madugay ini sa sulod sang prisuhan.
Nakagwa naman si Villa matapos nga maserbehan ang sentensya apang matapos makagwa, nagbalik naman ini sa pagbaligya sang iligal nga droga.
Paathag ni Batadlan nga nakuha sang mga ini ang impormasyon natuhoy kay Villa pinaagi sa mga nakaligad nga drug buybust operations nga nagtumod nga ini ang nagadagdag sang shabu sa Barangay Singcang Airport, Bacolod City.
Sanday Tibang kag Juanillo naman ang wala sang nauna nga kaso kag wala man sa listahan sang Barangay nga imbulbado sa iligal nga droga.
