Ginkumpirmar sang pinuno sang Coast Guard Station(CGS)-Negros Occidental nga kanselado ang mga biyahe sang fastcrafts kag roro vessels nga nagalayad Bacolod-Iloilo vice versa matapos malakip sa napaidalum sa Storm Signal Number 1 dala ni Bagyo Vicky ang Negros Occidental kag Iloilo.
Sa interview sang Bombo Radyo Bacolod kay Commander Ludovico Librilla, ginpahayag sini nga bangud may yara sang Storm Signal ang duha ka mga probinsya, automatic na nga kanselado ang mga byahe.
Suno kay Librilla, matapos maggwa ang weather bulletin sang Pagasa kaina sang aga, gilayon sila nga nagkanselar sang mga trip alas-5:00 kaina sang kaagahon.
May yara naman sang mga pasahero nga na-stranded sa Bredco kag Banago ports apang gin-abisuhan na ang mga ini nga magbalik sa tagsa nila ka mga panimalay kag hulaton nga magresume ang biyahe.
Nagpanugyan man si Librilla sa mga magagmay nga sakayang pandagat nga likawan anay ang pagpalawod para sa kaluwasan sang tanan.
