Gin-athag ni Negros Occidental Governor Eugenio Jose “Bong” Lacson nga ang provincial Capitol building lang ang plano nga sayluhon sa ciudad sang Talisay.
Madumduman nga ginmanduan sang gobernador si Provincial Administrator Atty. Rayfrando Diaz nga tun-an ang plano nga pagsaylo sang provincial capitol nagikan sa Bacolod City padulong sa Talisay City.
Sa interview sang Bombo Radyo Bacolod kay Lacson, ginpahayag sini nga nagakinahanglan nga makakuha sang three-fourths vote nagikan sa tanan nga miyembro sang Sangguniang Panlalawigan agud masaylo ang capitol.
Suno kay Lacson, luyag sini nga isaylo ang seat of power sang Provincial Government sa 25-hectares nga property sang probinsya sa Barangay Matab-ang, Talisay City.
Dugang pa sini nga ideal location gid ini bangud pwede diri masaylo ang tanan nga mga regional offices kag mangin bag-o nga government center.
Suno pa sa gobernador nga ang Kapitolyo karon sa ciudad sang Bacolod ang napalibutan na sang commercial establishments kag tuman kagutok sang trapiko.
Suno kay Lacson, posible nga ila ini padalman sa Enero sa masunod nga tuig kag pananglitan nga may yara na sang proposal nga mapasa sa SP, gilayon sila nga magapatawag sang public hearing angot sa plano.
