Gin-tag bilang lider sang New People’s Army (NPA) sa Negros Oriental ang city health officer sang Guihulngan City nga ginpatay kaupod ang iya mister sang Martes sang hapon.
Si Dr. Mary Rose Sancelan ang gintiro-patay sang motorcycle-riding suspects kaupod ang iya mister na si Edwin sa sagwa sang ila subdivision.
Nahibalaun nga si Sancelan ang pinuno sang local inter-agency task force against COVID-19 sa ciudad sang Guihulngan.
Sa impormasyon nga nakuha sang Bombo Radyo Bacolod, si Sancelan ang na-tag bilang NPA rebel nga si JB Regalado.
Sa peace forum sang Diocese of San Carlos, ginpahayag ni Sancelan sa isa ka video nga wala ini sang may mahimo kag nahadlukan siya kada maggwa ini agud magtrabaho.
Dugang pa sang doktor sa video nga indi siya makapatigayon sang basic services kaangay sang school-based immunization.
Hugot naman nga ginakondenar ni Most Rev. Gerardo Alminaza, bishop sang Diocese of San Carlos ang kamatayon sang mag-asawa.
Nagapanawagan si Alminaza sa publiko nga mag-ugyon agud matapos na ang pinatyanay sa iya nga Diocese.
Nagalaom man ini nga matublag ang gobyerno kag mabatyagan sang publiko nga under control ang sitwasyon.
Si Sancelan ang ikatatlo nga napatay nagikan sa listahan sang red-tagged individuals nga ginapahayag kahimuan sang anti-communist vigilante group nga Kawsa Guihulnganon Batok Komunista (KAGUBAK) sa Negros Oriental.
