Ginpasalig sang pinuno sang Provincial Disaster Management Program Division (PDMPD) sang Negros Occidental nga may yara sang nakahanda nga mga foodpacks bilang preparasyon para sa mga mahalitan sang bagyo Vicky.
Sa interview sang Bombo Radyo Bacolod kay Dr. Zeaphard Gerhart Caelian, nakacoordinate na sa ila ang Provincial Social Welfare and Development Office (PSWDO) agud magpahibalo nga may yara sila sang nakahanda na nga foodpacks santo sa nakasaad sa layi bilang pagpanghanda sa tion nga may kalamidad.
Ginpahayag man sini nga wala sang nakareport nga may yara sang nakaeksperyensya sang pagbaha kahapon.
Nagpanawagan man ini sa publiko nga magpabilin nga nagaaligmat kag indi maghatag sang kompyansa bangud sa malain nga panahon apisar nga mahina ang ginabubo nga ulan sang Bagyong Vicky apang nagasaka naman ang pagmadlos sini.
Ginalauman nga sa Domingo magagwa sa Philippine Area of Responsibility ang bagyo.
Sa karun padayon nga ginabantayan ang lakat sang panahon.
