Patay ang 23 anyos nga engineering graduate matapos ginlasak sang truck ang tricycle nga iya ginasakyan sa Circumferential Rd., Barangay Alijis, Bacolod City kagab-i.
Ginkilala ang biktima kay Prince Joaquin Relatos, residente sang Barangay Mansilingan, Bacolod City kag naggraduate sa kurso nga BS Civil Engineering sa UNO-R subong nga tuig.
Halin sa training si Relatos kag pauli na kuntani sang gindalasa sang gina-alegar pick-up ang ginasakyan niya nga tricycle.
Nagasunod ang truck nga may karga nga tubo gani nalasakan sini ang tricycle.
Bangud sa madamo nga pilas, gilayon nga ginbawian sang kabuhi si Relotos.
Pilason naman ang driver sang tricycle nga ginkilala kay Wilmar De Asis.
Sa karon, ginatumod pa sang Bacolod Police Station 7 ang gina-alegar pick-up nga nag-sagaid sa tricycle.
Nakahunong naman sa karon ang driver sang truck nga si Rene Codigo, residente sang Cadiz City, Negros Occidental.
Suno sa iloy sang biktima nga si Edna Relatos, nagikan sa ginpatigayon nga online streaming ang bata kag manugtapos naman sa training.
Pahayag sini nga nagkontak pa sa iya ang bata kag nagpahibalo nga papauli na ini.
Apang natingala sila nga takna alas-9:47 na, wala pa gihapon nakatawag ang bata gani gintawgan na sang mga ini apang pulis na ang nakasabat sa tawag.
Suno sa iloy, mabuot ang iya nga bata kag manugkuha na kuntani sang board exam.
Wala naman ini nagalaom nga madula ang anak bangod sa lamharon pa sini nga edad.
Ang lugar kun sa diin nagluntad ang aksidente ang wala sang street light kag tuman ka dulom nga ginluntaran naman sang pila na ka aksidente.
