Patay ang isa ka 58-anyos nga babayi matapos mabungguan sang Isuzu armored truck sa Araneta St., Purok Medalla Milagrosa, Barangay Sum-ag, Bacolod City kaina sang udto.
Sa impormasyon nga nakuha sang Bombo Radyo Bacolod, ang biktima ang ginkilala kay Pacita Ogdamin kag residente sang amo nga lugar samtang ang suspetsado naman amo si Dioslapid Pelayo, 52-anyos sang Sta. Clara Subdivision, Barangay Banago.
Ginapahayag nga nagatabok sa dalan ang biktima matapos ini nga nagparegister sa Department of Social Welfare and Development (DSWD) sa ila nga barangay sang hinali lang siya nabungguan sang armored truck nga nagabiyahe from south to north direction.
Bangud sa mabaskog nga impact, nakaangkon sang patal nga pilas sa ulo si Ogdamin nga gintunaan sang iya kamatayon.
Sa karon nakahunong na sa Bacolod Police Station 9 si Pelayo.
