Naga-apelar ang Bacolod Police Station 7 sa mga nakasaksi sa aksidente nga nagluntad sa Circumferential Rd., Barangay Alijis, Bacolod City kagab-i nga magbulig sa paghatag sang impormasyon agud matumod kun ano nga salakyan ang una nga nagsagaid sa tricycle antes ini ginlasak sang nagasunod nga truck nga may karga nga tubo.
Madumduman nga gilayon nga ginbawian sang kabuhi ang engineering graduate nga si Prince Joaquin Relatos, residente sang Barangay Mansilingan, Bacolod City nga pauli na kuntani sakay sa gin-arkilahan nga tricycle sang ginsagaid ini sang gina-alegar pick-up gani naglabog ang tricycle.
Nagasunod ang truck nga may karga nga tubo gani nalasakan sini ang tricycle kun sa diin gilayon nga ginbawian sang kabuhi si Relotos.
Pilason naman ang driver sang tricycle nga ginkilala kay Wilmar De Asis.
Sa interview sang Bombo Radyo Bacolod kay P/Executive Master Sgt. Alex Mendoza, deputy station commander sang Police Station 7, ginpahayag sini nga ang driver sang truck nga ginkilala kay Rene Codigo, residente sang Cadiz City ang priso sa karon matapos magsungka sa kapulisan samtang padayon pa nila nga ginatumod kun ano nga salakyan ang naka-side swipe sa tricycle.
Naga-apelar ini sa mga nakasaksi nga magpadulong sa police station agud maghatag sang dugang nga impormasyon nga makabulig sa pagsolbar sang aksidente.
Suno naman kay Randy Saranillo, barangay tanod sa Barangay Alijis kag nakasaksi sa aksidente, nakita nila ang salakyan nga Ford Ranger pick-up nga duag orange nga wasak ang ulo.
Gintinguhaan pa ini nga sundan sang pila ka mga pumuluyo apang wala na malagas pa.
Suno sa iya, posible amo ini ang salakyan nga nakasagaid sa tricycle.
