Liwat nga nagpahanumdom ang pinuno sang Bacolod Traffic Authority Office (BTAO) sa mga colorum nga tricycle nga indi magbiyahe sa national highway agud malikawan ang mga aksidente.
Madumduman nga kagab-i, patay ang engineering graduate nga si Prince Joaquin Relatos, residente sang Barangay Mansilingan, Bacolod City nga pauli na kuntani sakay sa gin-arkilahan nga tricycle sang ginsagaid ini sang gina-alegar pick-up kag nalasakan sang nagasunod nga truck nga may karga nga tubo.
Sa interview sang Bombo Radyo Bacolod kay Lt. Col. Luisito Acebuche, BTAO head, ginpahayag sini nga may yara gid sang iban nga mga tricycle drivers nga nagahingalit magbiyahe kun gab-i bangud nga wala sang traffic enforcers nga nagabantay.
Apang kuntani magsunod nalang ang mga ini sa layi bangud pananglitan madakpan, I-impound gid ang ila nga tricycle.
Nahibaluan nga pwede ang mga tricycle makabiyahe sa nasakupan sang barangay sini apang indi sila pwede maka-agi sa national highway.
Gin-athag naman ni Acebuche nga sarang lang ang mga tricycle makatabok sa national road.
Suno kay Acebuche, may yara karon sang 320 ka mga traffic enforcers sa Bacolod nga natunga sa duha ka mga shifts nga nagasugod alas-6:00 sa aga tubtob alas-7:00 sa gab-i.
Apang kun kaisa naga-extend pa sila tubtob alas-8:00 sa gab-i depende sa activity sa area.
Ginkumpirmar man sini nga wala sang Christmas break ang mga traffic enforcers bangud subong sila nga mga tinion kinahanglan sa dalanon tuga sang Christmas rush.
Samtang, ginkakibot naman sini ang nagluntad kahapon nga traffic jam sa ciudad bangud sa 50% promo sang dako nga gasolinahan sa pungsod.
Suno kay Acebuche, wala gid sang may nagpakig-angot sa ila talatapan angot diri gani nga wala nila ginlauman nga magagutok ang trapiko.
Maayo nalang suno sa iya nga gilayon man nga nakontrol ang traffic.
