Ginasuhestyon karon sang chairman sang Committee on Transporation sa Sangguniang Panlungsod sang Bacolod nga magbutang sang tatlo ka shifts ukon 24-hour operation sang traffic enforcers sa ciudad agud nga malikawan ang pagbiyahe sang mga colorum nga salakyan kun gab-i.
Sa interview sang Bombo Radyo Bacolod kay Councilor Dindo Ramos, ginpahayag sini nga kuntani mapatuman ang Bacolod Traffic Authority Office (BTAO) sang tatlo ka shifts para sa mga traffic enforcers agud may yara sang magabantay sa dalanon kun gab-i.
Suno kay Ramos, bisan diutay lang nga mga personnel ang ideploy sa dalanon kun gab-i, ang importante may yara lang sang magapangdakop sa mga colorum nga salakyan ilabi na ang mga tricycle nga nagakalit sang biyahe sa national road kag mga overloaded nga mga truck nga may karga nga tubo.
Samtang, ginpahayag naman ni Ramos nga magahatag ang ciudad sang condonation para sa mga real property owners nga magabayad sang ila nga full arrears ang indi na magbayad sang surcharges kag penalties tubtob Disyembre 31.
Samtang 50 porsyento naman nga condonation ang ihatag sa mga ini kun magbayad sila sa Enero tubtob Marso 31, 2021.
