Ginkumpirmar sang bag-o nga pinuno sang Social Security System (SSS) Bacolod branch nga may yara sang pagsaka nga 1% sa monthly contribution sang mga miyembro sang SSS sa masunod nga tuig.
Nahibaluan nga sini nga 2020, 12% sang sweldo sang mga miyembro ang katumbas sang ila nga kontribusyon sa ahensya kada bulan.
Sa interview sang Bombo Radyo Bacolod kay Ma. Sheila Galeno, bag-o nga SSS Bacolod branch head, ginpahayag sini nga sugod Enero 2021, 13% na sang monthly salary ang mangin monthly contribution sang kada miyembro.
Suno kay Galeno, ang amo nga tikang ang madugay na nga plano sang SSS antes pa man ang pandemic.
Ini agud mapasiguro man ang long-term viability sang pension fund kag mapasaka ang benepisyo nga makuha sang miyembro kag mga benepisyaryo sini.
Samtang, ginlunsyar naman subong nga adlaw ang Workers Investment and Savings Program (WISP).
Suno kay Galeno, isaini ka system of saving para sa retirement sa mga miyembro nga may yara sang ikasarang.
Paathag sini, magluwas sa basic pension nga makuha sa ulihi sang miyembro, may makuha pa gid ini nga dugang nga pension kun magsulod ini sa WISP.
Nahibaluan nga si Galeno ang nagpungko sa pwesto sang nagligad nga bulan sang Oktubre.
Ginbuslan sini si anay SSS Bacolod branch head Lina Hilado nga nadestino na karon sa ciudad sang Sagay.
