Duha ka miyembro sang New People’s Army (NPA) ang patay sa nagluntad nga engkwentro batok sa 11th Infantry (Lapu-Lapu) Battalion sang Philippine Army sa Sitio Libjo, Barangay Napacao, Siaton, Negros Oriental sang Huwebes sang gab-i.
Suno kay Maj. Cenon Pancito III, spokesperson sang 3rd Infantry Division sang Philippine Army, nagluntad ang engkwentro matapos nga makabatun sang report ang tropa gikan sa mga residente kag mga opisyales sang barangay nga may presensya sang Communist NPA Terrorist sa lugar.
Suno kay Pancito, ang kapin pito ka rebelde nga naengkwentro amo ang mga nabilin nga miyembro sang Southeast front, Komiteng Rehiyon Negros, Cebu, Bohol kag Siquijor nga napukan na.
Nagdugay sang 30 ka minutos ang pagbayluhanay sang lupok tubtob nangin madinalag-on ang pwersa sang gobyerno.
Ang engkwentro ang nagresulta sa pagkarecover sang duha ka mga bangkay sa bahin sang NPA kaupod ang ila nga mga armas.
Nakuha sa ila paghinakop ang isa ka cal. 5.56mm M653 nga baby armalite kag isa ka cal. 45 pistol.
Nakuha man sa lugar ang pila ka mga subersibo nga mga dukumento, isa ka bandolier nga may unod nga duha ka magazine sang M14, isa ka backpack nga may medical supplies, kag duha ka backpack nga naga-unod sang personal nga pagkabutang kasubong man medical paraphernalia.
Ginakasubo naman sang tagpamaba ang hitabo nga nagluntad mismo sa tion sang paskwa apang ang hitabo ang nagapakita man nga wala naga-untat ang operasyon sang Philippine Army.
Panugyan ni Pancito sa mga kabahin sang rebelde nga grupo nga binag-binagon ang mga hitabo kag untatan na ang armado nga pagpakigbato.
