163 ka mga locally stranded individuals (LSIs) nagikan sa Manila ang natalana nga maga-abot subong nga adlaw sa Negros Occidental.
Sa interview sang Bombo Radyo Bacolod kay Dr. Zeaphard Gerhart Caelian, Provincial Incident Management Team (PIMT), ginpahayag sini nga duha ka flights nagikan sa Air Asia sakay ang mga LSIs kag overseas Filipino workers (OFWs) ang magasulod subong nga adlaw sa probinsya.
Suno kay Caelian, indi pa matumod kun pila ka mga Negrense OFWs ang magaabot.
Ginkumpirmar man sini nga may ginapaabot man nga mga LSIs sakay sa barko nga papauli sa mga local government units (LGUs) sa probinsya nga wala sang moratorium.
Samtang, ginpahayag man ni Caelian nga sang Disyembre 24, 47 ka mga OFWs ang nag-abot samtang 26 ka mga OFWs naman ang nagpauli sang Disyembre 25.
Liwat naman nga nagpanugyan si Caelian sa publiko nga maghalong gid kag magsunod sa health protocols bangud mas mabudlay ang local transmission.
Suno sa iya, mas kontrolado ang mga LSI bangud nga gina-diretso ang mga ini sa quarantine facility.
