Ginkalipay sang pinuno sang Committee on Education sa Sangguniang Panlungsod sa syudad sang Bacolod nga ginsuspend na sang Department of Education ang dry run sang face to face classes.
Nahibaluan nga ginmanduan sang presidente ang Department of Education nga icancel ang resumption sang face to face classes nga patigayunon sa Enero 2021.
Sa interview sang Bombo Radyo Bacolod kay Councilor Renecito Novero, madugay naman ini nga nagapabutyag sang iya disgusto sa pagpatigayon sang face to face classes sa tunga sang COVID-19 pandemic.
Suno kay Novero, wala sang makasiguro nga ang tanan nga estudyante ang mabakod ang resistensya.
Suno diri, dapat likawan ang pagpanglaton bangud mahimo nga mabalik kita sa umpisa kun magsaka naman ang kaso.
Ginlantaw man sini nga paagi sa pagpabutyag sang mga sintimyento paagi sa media kaangay sang Bombo Radyo naglab-ot man sa igtulupangod sang national government kag ginpamatian man ini.
Ginpahayag man sang konsehal nga may vaccine man ukon wala dapat indi pag-ibalik ang face to face classes kun indi pa hilway sa COVID-19.
Suno kay Novero, bisan may vaccine pa indi man masiguro nga hilway nga gamiton ini.
Nagapati man sini nga kun sin-o ang nagaduso nga magkuha sang vaccine sa China sila ang dapat una bakunahan kag ipakita sa bilog nga pungsod ang epekto sini antes ihatag sa mga may priority nga mahatagan sang vaccine.
