Natalana nga inagurahan ang bag-o nga substation sang Bureau of Fire Protection (BFP) Bacolod sa Barangay Mansilingan, Bacolod City bwas nga adlaw, alas 9:00 sang aga.
Sa interview sang Bombo Radyo kay Fire Chief Inspector Publio Ploteña, Fire Marshall sang BFP Bacolod, madugay na nga handom ni BFP 6 Regional Director Fire Senior Superintendent Jerry Candido nga mabutangan sang substation sa Barangay Mansilingan agud mangin mahapos ang pagrespondi sa northern kag eastern nga bahin sang ciudad.
Suno kay Ploteña, magatambong man sa inagurasyon si Bacolod City Mayor Evelio “Bing” Leonardia, Vice Mayor El Cid Familiaran kag Congressman Greg Gatasaya.
Suno diri, dako ang mabulig sini sa pagrespondi kag pagserbisyo sa mga pumuluyo ilabi na sa Barangay Handumanan, Felisa, Mansilingan kag Alijis.
Apang kun mangayo sang bulig ang banwa sang Murcia kag Don Salvador Benedicto, sarang man nga makarespondi ang nasambit nga substation.
Sa karun, suno sa fire marshall, may yara sang isa ka central fire station kag anum ka mga substations nga nahamtang sa Sum-ag, Pahanocoy, Libertad, Rodriguez, Lopez Jaena kag Granada kag magadugang diri ang sa Mansilingan.
Nagalaom man si Ploteña nga kun mabutangan man sang substation ang northern nga bahin sang ciudad agud may malapit nga makarespondi sa Barangay Bata, Mandalagan kag Banago.
