Ginarekomendar ni Negros Occidental provincial health officer Dr. Ernell Tumimbang nga dapat pabakuron gid ang border control kag ang ginapatuman nga health protocol agud nga indi makasulod sa pungsod ang bag-o nga variant sang COVID-19.
Sa interview sang Bombo Radyo Bacolod kay Tumimbang, ginpahayag sini nga dapat I-enhance gid ang ginapatuman nga health protocol bangud nga in place naman ini.
Dugang pa ni Tumimbang nga dapat subong palang ipatuman na ang travel ban sa United Kingdom kag sa iban nga mga lugar nga may kaso sang bag-o nga strain sang coronavirus agud nga malikawan na nga maglapta pa ini sa pungsod.
Suno sa pinuno sang PHO, dapat nga tutukan sang pungsod ang prevention samtang wala pa nakasulod ang bag-o nga variant sang COVID-19.
Nagapati man si Tumimbang nga makapila ka bes na nga naka-mutate ang coronavirus kag madamo na ini sang variant bangud nga sang Setyembre pa ini nagtuhaw sa UK apang sini lang nga Disyembre gindeklarar matapos ang pila ka mga pagtuon.
Nahibaluan nga ang variant nga nadetect sa UK ang mas makalalaton bangud nga 70% nga mas contagious ini.
