Nagpasalig ang national commander sang Task Force Kasanag nga magabulig sila sa pagtipon sang dokumento kag ebidensya agud mapamatud-an nga may kaangtanan gid man sa gina-alegar korapsyon sa infrastructure projects ang pila ka mga miyembro sang House of Representatives nga ginbuyagyag kagab-i ni Presidente Rodrigo Duterte.
Madumduman nga kalakip sa mga miyembro sang House of Representatives nga ginbuyagyag ni Duterte amo sanday Josephine Ramirez Sato, Teddy Baguilat Jr., Alfredo Vargas, Henry Ramil Juminal, Alicia Sienna Tan, Paul Daza, Angelina Helen Tan, Eric Yap kag Geraldine Roman.
Gin-athag naman sang presidente nga ang alegasyon sang graft batok sa mga mamalidha ang wala pa mapamatud-an.
Sa interview sang Bombo Radyo Bacolod kay John Chiong, ginpahayag sini nga magapabilin ini bilang alegasyon tubtob nga indi pa mapamatud-an.
Ginpasiguro ni Chiong nga magabulig sila sa pagpangtipon sang ebidensya kag dokumento agud mahibaluan kun may yara gid man sang balasehan agud nga maconvict ang mga ini.
Apang pananglitan nga mapamatud-an nga inosente ini, suno kay Chiong, indi gid malikawan nga maguba ang ila imahe sa publiko kag pangduha-duhaan na sila sang pumuluyo.
Gani panugyan sini sa mga government officials nga likawan gid nga ma-imbolbar sa korapsyon agud nga maprotektahan ang imahe kag ngalan sini.
