Makabaton sang tag-3 mil nga gratuity bonus ang tanan nga contractual kag job order employees sang Bacolod City Hall.
Madumduman nga nagpagwa sang Administrative Order No. 38 kahapon si Presidente Rodrigo Duterte nga nagatugot sa paghatag sang Gratuity Pay para sa 2020 contract of service kag job order workers sa gobyerno.
Sa interview sang Bombo Radyo Bacolod kay City Treasurer Geovani Balalilhe, ginpahayag sini nga wala pa sang budget sa City Treasurer’s Office bangud kinahanglan pa sang resolusyon nagikan sa SP.
Gilayon naman nga nagmando si Bacolod City Mayor Evelio “Bing” Leonardia sa Sangguniang Panlungsod nga magpasar na sang Appropriation Ordinance nga nagabalor sang P21 million para sa P3,000 nga gratuity pay sang mga contractual kag job order workers para sa 2020.
Nahibaluan nga ang mga nag-render sang less that four months ang sarang makabaton sang kaangay nga incentive sa pro-rata basis.
Kun naka-trabaho sang tatlo ka bulan apang indi maglapaw sa apat ka bulan, sarang ini makabaton sang P2,000; P1,500 naman ang makuha sang mga nagtrabaho sa sulod sang duha ka bulan kag indi maglapaw sa tatlo ka bulan kag ang mga nagrender naman sang less than 2 months ang may gratuity pay nga indi maglapaw sa P1,000.
Madumduman nga ang Bacolod City Government ang nakapanghatag na sang lima ka klase sang cash incentives para sa mga empleyado sini nga regular, contractual kag casual employees halin sang Nobyembre tubtob Disyembre sini nga tuig.
Ini ang ginalakipan sang Year-end bonus, Performance-Based Bonus, Cash Gift nga P5,000, Collective Negotiation Agreement (CNA) Incentive nga P25,000, kag Productivity Enhancement Incentive (PEI) nga P5,000.
Natalana man sila nga magbaton sang additional nga P10,000 bilang Service Recognition Incentive (SRI) sini nga Enero.
