Nakilal-an na ang duha ka miyembro sang New People’s Army (NPA) nga napatay sa nagluntad nga engkwentro batok sa 11th Infantry Battalion sang Philippine Army sa Sitio Libjo, Barangay Napacao, Siaton, Negros Oriental sang Disyembre 24 sang gab-i.
Madumduman nga nagdugay sang 30 minutos ang pagbayluhanay sang lupok sang tropa sang gobyerno batok sa kapin pito ka mga miyembro sang Southeast front, Komiteng Rehiyon Negros, Cebu, Bohol kag Siquijor.
Sa interview sang Bombo Radyo Bacolod kay Army Major Cenon Pancito III, spokesperson sang 3rd Infantry Division sang Philippine Army, ginpahayag sini nga may mga himata nagikan sa Siaton nga nag-identify kag nag-claim sa isa ka bangkay samtang nagpagwa naman sang statement ang NPA kun sa diin ila ginkilala ang isa ka bangkay nga residente sang Bohol.
Suno kay Pancito, ila man nga ginapakig-angutan ang pamilya sang isa sa mga napatay nga taga-Bohol agud mahatagan sang maayo nga lubong ang NPA member.
Madumduman nga nakuha sa ila paghinakop ang isa ka cal. 5.56mm M653 nga baby armalite kag isa ka cal. 45 pistol.
Nakuha man sa lugar ang pila ka mga subersibo nga mga dukumento, isa ka bandolier nga may unod nga duha ka magazine sang M14, isa ka backpack nga may medical supplies, kag duha ka backpack nga naga-unod sang personal nga pagkabutang kasubong man medical paraphernalia.
