Nagpahanumdum ang bise-alkalde sang ciudad sang Bacolod sa mga pumuluyo nga padayon nga magsunod sa mga protocols bangud indi pa available ang bakuna apang nagapabilin gihapon ang virus.
Sa interview sang Bombo Radyo kay Vice Mayor El Cid Familiaran, ginpahayag sini nga apisar magapabilin sa modified general community quarantine (MGCQ) ang Bacolod City, kinahanglan gihapon maghalong ang tanan tubtob nga mag-abot na ang bakuna ilabi na sa karun nga may yara naman sang bag-o nga variant sang virus.
Suno kay Familiaran, damo ini may nagakakit-an nga mga pictures kun sa diin makit-an nga wala nagsuksok sang face mask ang mga tawo kag wala man naga-obserbar sang social distancing.
Ginalauman man sini nga magadamo pa gid ang tawo sa mga malls kag mga salakyan sa dalanon bangud sa Christmas kag New Year’s rush.
Apisar sang holiday season, padayon nga nagapanaway ang task force sang ciudad agud masiguro nga nagasunod ang tanan sa protocols.
Ginakalipay man sini ang padayon nga pagnubo sang kaso sa Bacolod City kag nagapangamuyo nga padayon nga ubayan sang Ginoo ang ciudad sa masunod nga tuig.
