Naga-apelar ang gobernador sang Negros Occidental sa mga pumuluyo nga magsunod sa mga pagsulundan nga ginapatuman sang gobyerno batok sa coronavirus disease.
Nahibaluan nga sumugod subong nga adlaw tubtob Enero 3, wala na sang opisina ang mga empleyado sang gobyerno gani kadungan sang katapusan nga kahigayunan sa tuig 2020 nga pag-atubang ni Governor Eugenio Jose “Bong” Lacson sa mga katapo sang media, nagpahanumdum ini sa mga pumuluyo nga maghalong kag magsunod sa mga health protocols.
Suno kay Lacson, wala man sang dapat kahangaw-an sa bag-o nga strain sang virus bangud indi ini malala apang mas makalalaton lang.
Nagapati man ini nga magapabilin sang pila ka bulan ang probinsya sa modified general community quarantine.
Padayon man suno sa iya ang ginapatigayon nga swabbing kag quarantine sang provincial government sa mga Negrense kag magapabilin ini tubtob sa masunod nga tuig ilabi na nga may bag-o nga pondo ang probinsya.
