Mangin normal ang byahe sang Ceres bus samtang maga-untat naman sa pagbyahe ang mga roro vessel kag fastcraft nga nagalayag Iloilo-Bacolod vice versa takna alas-12:00 bwas sa udto kag maga-resume alas-9:00 sa aga sang Enero 1 kadungan sa pagsaulog sang Bag-ong Tuig.
Sa interview sang Bombo Radyo Bacolod kay Jade Seballos, media relations officer sang Vallacar Transit Inc., ginpahayag sini nga regular ang biyahe sang mga Ceres bus sa Negros Occidental tubtob sa Enero 1 gani wala sang dapat kabalak-an ang riding public.
Dugang pa sini nga apisar diutay lang ang pasahero, indi sila mangbuhin sang unit nga magabiyahe.
Samtang, ginkumpirmar naman ni Commander Ludovico Librilla, pinuno sang Coast Guard Station Negros Occidental nga tubtob alas-12:00 sa udto lang bwas ang byahe sang mga sakayang pandagat kag magaresume ini alas-9:00 sang aga sa Enero 1.
Dugang pa sini nga diutay lang ang pasahero kag trucking nga nagatabok pa Iloilo kag naga-abot sa Bredco port subong.
Ginkanselar naman sang fastcat ang ila nga 11am nga trip kaina sang aga bangud nga wala sang masyado nga pasahero kag truck nga karga.
