Nagalaom ang presidente sang Integrated Bar of the Philippines (IBP) Negros Occidental chapter nga maimbestigaran gilayon ang ginpatigayon nga inoculation batok sa COVID-19 sa mga government officials kag presidential security group gamit ang bakuna nagikan sa China apisar nga wala pa ini naaprubahan agud magamit diri sa Pilipinas.
Madumduman nga ginkumpirmar sang Lunes nanday Interior Secretary Eduardo Año kag ni Army chief Lt. Gen. Cirilito Sobejana ang pagbakuna kasunod sang pagbuyagyag sini ni Presidente Rodrigo Duterte sang Sabado.
Sa interview sang Bombo Radyo Bacolod kay Atty. Edmundo Manlapao, presidente sang IBP Negros Occidental chapter, ginpahayag sini nga dapat maimbestigaran gilayon sang Food and Drug Administration (FDA) ang inoculation bangud nga ang bakuna nga gingamit nagikan sa China ang indi pa aprubado para magamit apisar pa nga donasyon lamang ini.
Magluwas dira, dapat man nga magpatigayon sang imbestigasyon suno kay Manlapao ang Bureau of Customs agud matumod kun paano nakalusot ang suplay sang bakuna nga gindevelop sang Chinese pharmaceutical company nga Sinopharm.
Dugang pa sini nga tuman ka misteryoso sang amo nga donasyon bangud nga wala ginbuyagyag sang mga opisyales kun sin-o ang donor sini.
Suno kay Manlapao, may yara sang penalidad nga pagkapriso sang isa ka tuig tubtob 10 ka tuig kag multa nga tubtob P500,000 sa pag-manufacture, importation, exportation, sale, offering for sale, distribution, transfer, nonconsumer use, promotion, advertising, ukon sponsorship sang ano man nga health product nga indi rehistrado sa FDA kag makabig bilang iligal.
