Naintindihan sang Tourism Congress of the Philippines ang desisyon sang pungsod nga pagpatuman sang travel ban sa 20 ka mga pungsod lakip na ang United Kingdom agud malikawan ang transmission sang bag-o nga COVID-19 variant.
Madumduman nga kahapon, ginpahayag ni Presidential spokesperson Harry Roque nga epektibo subong nga adlaw, Disyembre 30 tubtob Enero 15, ginadumilian ang pagsulod sa pungsod sang mga traveler nagikan sa Denmark, Ireland, Japan, Australia, Israel, The Netherlands, Hong Kong, Switzerland, France, Germany, Iceland, Italy, Lebanon, Singapore, Sweden, South Korea, South Africa, Canada, Spain kag UK.
Samtang exempted naman nagikan sa travel ban ang mga Pilipino nga nagikan sa mga nasambit nga pungsod apang kinahanglan nila nga magpaidalum sa absolute facility-based 14-day quarantine period kag may yara sang negative RT-PCR test result.
Sa interview sang Bombo Radyo Bacolod kay Jose Clemente III, presidente sang TCP, ginpahayag sini nga apisar nga amat-amat palang nga nagabalik ang tourism industry sa pungsod, naintindihan sini kun ngaa kinahanglan nga magpatuman sang pungsod sang travel ban.
Mas maayo nalang suno kay Clemente nga indi na nga daan pagpahanugutan nga makasulod sa pungsod ang bag-o nga strain sang virus.
Aminado naman ini nga ang bulan kuntani sang Disyembre ang peak period para sa mga turista nagikan sa iban nga mga pungsod.
Apang suno sa iya, kalabanan nga nalakip sa listahan sang travel ban amo ang main market kuntani sang turismo sa Pilipinas.
Suno kay Clemente, dako nga butang dapat ini agud nga mabuhi liwat ang ekonomiya apang ila nalang gina-intindi nga mas importante nga magdoble halong agud nga malikawan ang transmission sang bag-o nga variant sang COVID-19.
