Isa ka apat ka tuig nga bata nga lalaki ang nangin una nga biktima sang firecracker-related incident sa Bago City, Negros Occidental.
Suno kay P/Maj. John Joel Batusbatusan, hepe sa Bago City Police Station, ang bata ang nalukpan sang boga sa mata sa Barangay Bacong, Bago City.
Suno kay Batusbatusan, ang boga ang ginhemo sang amay sang bata indi agud gamitun para sa pagsug-alaw sa bag-ong tuig, kundi agud nga magamit sa pagpanabog sang mga pispis sa ginapanag-iyahan nga talamnan.
Natabo ang insidente sang Desyembre 27, takna alas-4:30 sang hapon.
Suno kay Batusbatusan, ginpahayag sang tatay nga si Randy Recania nga wala nila natalupangdan nga ginkuha sang apat ka tuig nga bata nga si John Paul Recania ang boga agud hampangan.
Aksidente naman ini nga naglupok kag naigo sa mata ang bata.
Mapalarun naman nga minor lang ang injury nga naagom sang bata.
Sa pihak nga bahin, ginalauman sang mga retailers sang firecrackers sa banwa sang Hinigaran nga subong nga adlaw magadinaguso ang manugbakal sang palupok sa ila ginadisplayhan sa higad sang highway sa Barangay Anahaw.
Sa interview sang Bombo Radyo sa presidente sang firecracker retailers association sang Hinigaran nga si Ernesto Cuachon, tubtub subong nga adlaw ang ila pagdisplay sang palupok, apang sa masami, Disyembre 31 naman nagadamo ang manugbakal.
Tinalikdan nga adlaw suno sa iya, may yara naman sang nagabakal agud nga makaobserbar sang social distancing.
Aminado naman ini nga indi tuman kadamo ang manugbakal subong bangud sirado ang border sang Negros Occidental kag Oriental kun sa diin nagagikan ang iban nga bumalakal.
Ginpasalig ni Cuachon nga ginapatuman nila ang social distancing kag dapat nagasuksok sang face mask ang nagabakal.
Suno sa retailer, mangin dako ang epekto sa ila kun idumili ni Presidente Rodrigo Duterte ang palupok sa masunod nga tuig bangud diri man sila nagasalig sang galastuhon.
