Apisar nga naulihi nga ginpahanugutan sa pagbaligya ang mga fruit vendors sa dalan Gonzaga sa ciudad sang Bacolod, nagalaom gihapon ang mga manugbaligya nga makaganar subong nga bag-ong tuig.
Suno kay Bongbong Villarias, manugbantay sa fruit stand, nagsugod sila nga ginpahanugutan nga makabaligya sa lugar sang Desyembre 21 samtang magatinir naman sila tubtob sa Enero 6, 2021.
Suno kay Villarias, sa karun ang ubas ang may presyo nga P120 ang kada kila sang may liso, samtang ang seedless naman ang nagadangat sa P300 sa ensakto nga pagkilo.
Samtang pila naman sa nagabaligya ang nagadiskarte pinaagi sa pagbaligya sang tunga ukon ¼ sang kinilo sang grapes.
Samtang ang Kabugaw naman ang nagabalor P80 kada kila kag ang Peras ang yara sa P20 tubtob P40 ang bilog depende sa kadakuon.
Maayo naman ang baklanay suno kay Villarias apang dako gihapon ang kinalain kun ikumparar sang tinalikdan nga tuig bangod sa krisis nga tuga sang pandemic.
Apang suno diri, nagabalik gid gihapon agud magbakal ang ila nga mga suki.
Nagalaom naman si Villarias nga mangin matawhay ang tiempo subong nga adlaw kag makabawi sila ukon makaginansya sang ginagmay.
