Pabor ang hepe sang Murcia Municipal Police Station sa deklarasyon ni Presidente Rodrigo Duterte nga wala sang ipatuman nga ceasefire batok sa mga komunista nga grupo tubtob matapos ang termino sini sa tuig 2022.
Sa interview sang Bombo Radyo Bacolod kay Police Lt. John Paul Tabujara, madamo na sang instances nga natabo nga wala nagasunod ang New Peoples Army (NPA ) sa ginapatuman nga ceasefire sang gobyerno.
Ginasuportahan man sang Murcia Municipal Police Station ang tanan nga programa sang presidente sa pagpanguna sang ila hepe.
Nagpasalig man si Tabujara nga ang kapulisan sang Murcia ang handa 24/7 sa pagprotekta sa mga pumuluyo sang banwa.
Nagapadayun man sila sa pagpatigayon sang Camp Defense Plan bangud wala makahibalo sang mga plano sang mga komunistang-terrorista nga grupo.
Hugot man nila nga ginabantayan ang Murcia Municipal Police Station bangud wala sila nakahibalo kun ano nga mga detachments ang mahimo nga sudlon sang mga komunista nga grupo.
Ginpasalamatan man ni Tabujara ang tanan nga mga katapo sang nasambit nga police station bangud nagnubo ang crime rate sang banwa tungod sa ila.
Padayon man ang pagtipon sang impormasyon sang intel operatives sang Murcia Municipal Police Station agud nga malikawan ang mga insidente.
Ginpahayag man sini nga handa siya sa pagbulig sa mga police personnel tubtob sa masarangan niya kag una gid siya magsuporta sa mga plano, magguide kag magprotekta sa mga personnel sini.
Nagpanugyan man ang hepe sa mga personnel nga ipadayon lamang nila ang pagserbisyo sa banwa sang Murcia.
