Kapin 1,200 ka mga panimalay ang apektado sang pagbaha sa anom ka mga barangay sa banwa sang EB Magalona.
Sa interview sang Bombo Radyo Bacolod kay EB Magalona Mayor Marvin Malacon, ginpahayag sini nga lakip sa mga apektado nga barangay amo ang Tanza, Latasan, San Jose, Sto. Niño, Consing kag San Isidro.
Suno kay Malacon, may mga lugar na nga naga-amat-amat subside ang tubig apang may yara sa gihapon sang nagapadayon nga nagasaka.
Dugang pa sang alkalde nga may mga dalan nga indi pa passable bangud nga nag-overflow sa dalan ang tubig-baha.
May mga naka-standby naman karon nga mga heavy equipment vehicle sa dalanon agud magbulig sa mga salakyan nga indi makalabay.
Suno kay Malacon, sa mga luyag magpangayo sang bulig apang indi makakontak sa banwa, sarang ang mga ini magdangop sa Bombo Radyo Bacolod agud nga ang estasyon ang magapahibalo sa alkalde.
Suno naman kay Barangay San Jose Punong Barangay Willie Guilaran, mga alas-5:30 kaina sang kaagahon sang nabatian nila nga nagbagting ang hacienda.
Nahibaluan nga nagabagting ang hacienda kun may yara sang magluntad nga emerhensya.
Suno kay Guilaran, wala ini maglaom nga madasig nga nagsaka ang tubig-baha nga naglab-ot sa hawak sang isa ka tawo.
Sa pinakaulihi nga data sang punong barangay, nagadangat sa 205 ka mga indibidwal ang apektado sang pagbaha sa ila nga lugar.
Ginahanda naman karon ang foodpacks nga inugpanagtag para sa mga ini.
