Patay ang 27-anyos nga lalaki matapos gintiro-patay sang motorcycle-riding suspects sa Purok Sigay, Barangay 2, Bacolod City kaina sang kaagahon.
Ginkilala ang biktima kay Jomar Pahamutang kag residente sang amo nga barangay.
Sa interview sang Bombo Radyo Bacolod kay P/Capt. Leo Estopa, hepe sang Bacolod Police Station 2, ginpahayag sini nga yara sa sulod sang ila nga tyangge ang biktima sang hinali lang ini ginluthang sang mga wala pa nakilal-an nga mga suspetsado sakay sa motorsiklo.
Nakaangkon si Pahamutang sang igo sang bala sa dughan kag tyan kun sa diin ginhingagaw pa ini dala sa ospital apang gindeklarar nga dead on arrival.
Nakuha sa crime scene ang anom ka mga empty fired cartridge sang caliber .45 kag isa ka slug.// Suno kay Estopa, anay tokhang drug surrenderer si Pahamutang.
Nagligad nga Agosto 2020 may yara man sang nagtuyo nga magpatay sa biktima.
Sa karon padayon pa ang imbestigasyon sang kapulisan angot sa insidente.
