Dako ang pagpasalamat sang Bacolod City Police Office sa publiko bangud nangin generally peaceful ang pagsug-alaw sang tuig 2021.
Sa interview sang Bombo Radyo Bacolod kay Lt. Col. Ariel Pico, spokesperson sang BCPO, nalab-ot nila ang objectives sang oplan ligtas kapaskuhan kag bag-ong tuig bangud wala sang may narekord nga insidente sa palupok ilabi na sa stray bullet tuga sang indiscriminate firing.
Suno diri, wala sang rekorded nga report ang napulo ka mga police stations diri sa syudad sang Bacolod nga may nabiktima sang palupok apang padayon sa gihapon ang ila nga monitoring bangud indi mapaktan ang giho sang mga kabataan ilabi na nga nag-inulan kahapon nga adlaw, Disyembre 31, 2020 tubtob kaina sang kaagahon sa diin ginsug-alaw ang bag-ong tuig 2021 kag wala maayo sang may nakapalupok.
Dugang pa ni Pico, indi manigar nga may mga kabataan sa gihapon ang magapalupok ilabi na ang mahilig mangpulot sang palupok sa dalan.
Samtang, ginkasubo man sang BCPO ang natabo nga insidente sa dalan Araneta sa Barangay Tangub sa diin ang isa ka pribado nga salakyan ang nakabunggo sa center island nga gintunaan sa pagka-disgrasya sang tatlo ka menor de edad sa diin ang isa ang ginbawian gid sang kabuhi.
Magluwas sa disgrasya sa dalanon, may yara man sang natabo nga stabbing incident sa Barangay Pahanocoy, pagkasapo sa isa ka fetus sa kanal sa Barangay Singcang-Airport, kag pagtiro-patay sa isa ka drug surrenderee sa Purok Sigay, Barangay 2, apang ini ang ginakabig lamang nga isolated cases.
Sa pihak sini, nagapasalamat sa gihapon ang BCPO bangud sa ginhatag nga kooperasyon sang publiko rason nga nangin matawhay ang pagsug-alaw sang bag-ong tuig.
