Ginpasalig sang pinuno sang Provincial Disaster Management Program Division (PDMPD) sang Negros Occidental nga padasigon nila ang pagkaayo kag rehabilitate sang water level system sa Malugo River agud nga may yara sang early warning kun nagasaka na ang tubig sa amo nga suba.
Madumduman nga ginsugata sang pagbaha ang pila ka mga lugar sa Northern Negros nga nag-apekto sa libo-libo ka mga indibidwal.
Sa interview sang Bombo Radyo Bacolod kay PDMPD head Dr. Zeaphard Gerhart Caelian, ginpahayag sini nga bangud sa pagsugat-anay sang hightide nga nagadangat sa 1.7 meters kag sige-sige nga pag-ulan, nagsaka sang tubig sa Malugo river nga konektado sa iban pa nga mga suba kag creek sa Talisay City, Silay City, EB Magalona kag Victorias City.
Suno kay Caelian, tinguhaan gid nila nga mapadasig ang pagbalik sang water level system bangud importante ini nga balasehan agud makahatag sang impormasyon sa pumuluyo antes sang pagsaka sang tubig sa mga suba kag creek sa probinsya.
Magluwas diri, I-refer naman ni Caelian sa Department of Science and Technology (DOST) Region 6 ang guba nga rain guage sa ciudad sang Silay kag Talisay nga posible naapektuhan sang pagbaha.
