Nagahingyo ang Metro Bacolod Chamber of Commerce and Industry sa national government sang Pilipinas kag sa local government unit sang Bacolod nga magpatuman subong nga tuig 2021 sang programa para sa pagbangon sang ekonomiya.
Sa interview sang Bombo Radyo kay Metro Bacolod Chamber of Commerce and Industry (MBCCI) president Frank Carbon, ginpahayag sini nga dapat magpagwa sang kwarta ang national government subong man ang LGUs agud maghimo sang mga obra kag livelihood para sa mga pumuluyo nga nadulaan sang trabaho bangud sa pandemic.
Suno kay Carbon, kun may yara sang trabaho, may yara naman sang purchasing power ang mga pumuluyo.
Paagi sini, makabalik sa pagbukas ang mga negosyo nga amat-amat naman nga makapabangon sang ekonomiya.
Suno sa iya, dapat may yara sang mga programa kaangay sang cash for work kag financial assistance sa mga magagmay nga negosyo ang national government kag LGUs.
Panindugan ni Carbon nga agud indi magretrench ang mga negosyo, dapat suportado ini sang gobyerno.
